अभिकर्ता केन्द्रिय संघर्ष समिति नेपाल लाइफद्वारा पुस १७ गतेदेखि कुनै पनि पोलिसी बिक्री नगराउन आह्वान

काठमाण्डौ । नेपाल लाइफ इन्स्योरेन्स कम्पनी लिमिटेडका अभिकर्ताहरुको संगठन‘अभिकर्ता केन्द्रिय संघर्ष समिति नेपाल लाइफ’ले आगामी पुस १७ गतेदेखि कुनै पनि बीमा पोलिसी बिक्री नगराउन आह्वान गरेको छ । संघर्ष समितिले नेपाल लाइफको अभिकर्ताहरुको जायज माग सम्बोधन नगरी बेवास्ता गरेमा पुस १७ गतेदेखि नयाँ बीमालेख बन्द गरी कम्पनीले आयोजना गर्ने सम्पूर्ण कार्यक्रम बहिष्कार गर्ने जनाएको हो । 

संघर्ष समितिले कम्पनीले बीमित र अभिकर्तामाथि पटकपटक ज्यादती गरेको र कम्पनीमा मेरुदण्ड मानिएका अभिकर्ताहरुको रोजीरोटीमाथि आघात पुर्याउने हिसाबले जिरो कोड तालिम सञ्चालन गरेको आरोप लगाएको छ । यस्तै अभिकर्ताले आउँदै आएको सेवासुविधालाइए एकलौटी ढंगले भंग गरी मनोमानी तरिकाले आफुखुसी लादिएको आरोप लगाइएको छ । यस विषयमा कार्यबाहक सीईओ सुशिल कुमार चौथरीले छलफल वा वार्ता गराउँछु र यसो गर्न नसकेमा स्वयम कम्पनीको सिस्टम बन्द गरी नयाँ बीमालेख रोक्छु भनी गरेको प्रतिवद्धता पुरा नगरेको संघर्ष समितिले जनाएको छ । यस्तै गत पुस १० गते व्यवस्थापन र सञ्चालकलाई नबोलाइकनै होटल मेची क्राउन धुलाबारी झापामा वार्ताका लागि बोलाई आफुहरुको उपहास गरेको समितिले जनाएको छ । 

सीईओको यो व्यवहारको घोर भत्र्सना गर्दै गत पुस १० गते नै बसेको अभिकर्ताको भेलाले पुस १६ गतेभित्र आफ्ना माग पुरा नभएमा १७ गतेदेखि कनै पनि बीमा पोलिसी बिक्री नगर्ने निर्णय गरेको समितिले जनाएको छ । आफ्नो निर्णयलाई कमजोरी ठानी अभिकर्ताको हितविपरित कार्य गरे त्यसबाट हुने सम्पूर्ण क्षति कम्पनीले व्यहोनुपर्ने चेतावनी संघर्ष समितिले दिएको छ ।