अरुण काबेली पावरद्वारा वार्षिक साधारण सभा आह्वान, लाभांस पारित मुख्य अजेन्डा
काठमाण्डौ । अरुण काबेली पावर लिमिटेडले वार्षिक साधारण सभा आह्वान गरेको छ । कम्पनीको भदौ १ गते बसेको सञ्चालक समितिको बैठकले कम्पनीको ११ औँ वार्षिक साधारण सभा आह्वान गरेको हो । बैठकले आगामी भदौ २६ गते शनिबारका दिन काठमाण्डौ थापाथलीमा रहेको कम्पनीको प्रधान कार्यालयमा जुम एपको माध्यमबाट सभा आयोजना गर्ने निर्णय गरेको हो ।
उक्त सभामा कम्पनीद्वारा आर्थिक वर्ष २०७७/७८ को मुनाफाबाट सेयरधनीहरुलाई चुक्तापूँजीको १७ प्रतिशत बोनस सेयर र ०.८९ प्रतिशत नगद लाभांस प्रदान गर्ने विशेष प्रस्ताव पारित गरिनेछ । यस्तै बोनस सेयरपश्चात कायम हुने चुक्तापूँजीमा एक बराबर १ का दरले हकप्रद सेयरका लागि स्वीकृती प्रदान गरिनेछ ।
सभामा हाल कम्पनीको सञ्चालक समितिमा रहेका ७ जना सञ्चालकहरुको संख्या घटाएर सञ्चालक समितिको संख्यालाई ५ जनामा सीमित गर्ने प्रस्ताव पारित गरिनेछ । यसैगरी आर्थिक वर्ष २०७७/७८ को सञ्चालक समितिको वार्षिक प्रतिवेदन पारित गरिनेछ । सभामा लेखापरीक्षकको प्रतिवेदन सहितको आर्थिक वर्ष २०७७/७८ को वासलात, नाफा नोक्सान हिसाब र नगद प्रवाह विवरण लगायतका वित्तीय विवरणहरुमाथि छलफल गरी पारित गरिनुका साथै आर्थिक वर्ष २०७८/७९ का लागि लेखापरीक्षकको नियुक्ती तथा निजको पारिश्रमिक निर्धारण गर्ने प्रस्ताव पारित गरिनेछ ।
कम्पनीले वार्षिक साधारण सभा तथा लाभांस वितरण प्रयोजनका लागि आगामी भदौ १५ गतेदेखि २५ गतेसम्म बुक क्लोज गर्ने निर्णय गरेको छ । यसर्थ भदौ १४ गतेसम्म कायम सेयरधनीहरुमात्रै कम्पनीद्वारा प्रस्तावित लाभांस प्राप्त गर्न र सभामा सहभागी हुन योग्य हुनेछन् ।
