नेशनल माइक्रोफाइनान्सद्वारा लाभांस वितरणको प्रस्ताव
काठमाण्डौ । नेशनल माइक्रोफाइनान्स लघुवित्त वित्तीय संस्था लिमिटेडले लाभांस वितरणको प्रस्ताव गरेको छ। संस्थाको गत पुस १९ गते बसेको सञ्चालक समितिको बैठकले गत आर्थिक वर्ष २०७६/७७ का लागि लाभांस वितरणको प्रस्ताव गरेको हो।
बैठकले आ.व २०७६/७७ को मुनाफाबाट चुक्तापूँजीको २१ प्रतिशत बोनस सेयर र ६ प्रतिशत नगद लाभांस गरी कुल २७ प्रतिशत लाभांस वितरणको प्रस्ताव गरेको हो। संस्थाद्वारा प्रस्तावित लाभांसमा हाल कायम चुक्तापूँजी २६ करोड ४० लाख ४५ हजार २५० रुपैयाँको २१ प्रतिशतले हुन आउने ५ करोड ५४ लाख ४९ हजार ५०२ रुपैयाँ बराबरको बोनस सेयर र ६ प्रतिशतले हुन आउने १ करोड ५८ लाख ४२ हजार ७१५ रुपैयाँ बराबरको नगद लाभांस(कर समेतका लागि) रहेका छन्।
यसरी संस्थाले कुल २७ प्रतिशतले हुन आउने ७ करोड १२ लाख ९२ हजार २१७ रुपैयाँ बराबरको लाभांस वितरणको प्रस्ताव गरेको छ।
यो लाभांस नेपाल राष्ट्र बैंकबाट स्वीकृत भएपछि संस्थाको आगामी वार्षिक साधारण सभाबाट पारित गरी सेयरधनीलाई वितरण गरिनेछ।
